Cari piemmini giovani e veci,
Carneval xe passado (almeno un toco, quel che resta i lo fa sabato... e gavemo già dado disposizioni che no i ne crei massa casini, che alle 6 i muli ga de giogar), la Cantada i la ga fata: sior Anzoleto ga fato testamento, provo a farlo anche mi... e oviamente, no sarà la stessa roba...
Ve lasso i consigli alimentari de Paolo Rosmanit: se rivè, provè a seguirli... lui disi che funzia: ma no stè chiederghe consigli davanti a altra gente, magari in pizzeria, che dopo che i la ga sparada xe de sconderse soto la tola.. Mi no so se xe una dieta, e spero che no sie quela che segui Capo: perchè a vederlo, diria che no la servi sai...
Ve lasso una squadra che se xe sempre tanti a allenamento, che che se vinsi o che se perdi se va sempre fora a far festa, e che i risultati riva sempre: la prima squadra della PM... e sì, ve lasso anche la serie D: che mal no i sta andando, 'sti fioi... ma i ga de magnar polenta prima de competer co i califfi!
Ve lasso un signor alenador, che dopo aver cavà sangue dai sassi, esserse salvado per due anni de fila, gà alzado bandiera bianca, perchè el suo, de sangue, ghe lo gavevi cavado tutto... ma che el xe sempre presente, anzi, el ga anche ripreso a allenarse (cossa sarà mai aver 70 anni... ghe ne ga solo 4 più de Eros), che el disi che no i ghe la faseva più ma che el smaniassi per esser de novo in panchina... e ve lasso un alenador che xe tornado, che gaveva de farse perdonar una retrocession e che sotto sotto el spera de compensarla... ciò Thomas, no te farà miga el mona, vero? Sa che quota che ne toca meter, el prossimo anno?
Ve lasso i scalini della Verde, che i torna sempre utili se metè mal el pie e ve girè una caviglia: mi no credo che servi, e no credo gnanca che un ortopedico approveria, ma el postin disi che cussì se fa... e allora femo finta de crederghe: come che fasè con mi, ai mati se ghe da sempre ragion!
Ve lasso i sorrisi de Cap: li go contadi, fin a prima de Carneval xe stadi quattro... consulteremo i annali, ma me sa tanto che xe record del mondo... e se no del mondo, per lui sicuro...
Ve lasso i arancini della mamma de Quargnaletto: giovane, sappi che te se ga conquistado de diritto un posto nel cuor della PM... e te se ga meritado l'obbligo (no morale, eh: xe un obbligo vero) de portarli a ogni festa che vegnerà fatta, da qua al centenario... Perchè sia chiaro, el centenario lo festeggemo...
Ve lasso i piemmini che xe in giro per el mondo: chi in Germania, chi in Ungheria (savendo che nissun ghe credi, che un va a Budapest per lavorar... Iula, 'sti traffici illeciti lassili star...), ma tutti che 'pena che i xe ta 'ste bande un scampon in palestra i vien a farlo...
Ve lasso tre generazioni de capitani: un che va per i 40 ma che xe sempre un putel e che el cori più dei putei, un che xe ciapà dei tatuaggi ma no'l ghe ga mostrado a nissun che el più bel, quel col nostro nome, i lo ga dentro el petto... e un che xe un putel, e che te lo pol trovar a San Giacomo, a Valmaura o a Staransan, ma l'unico posto dove che te son sicuro de trovarlo xe in campo co' conta...
...e ve lasso ancora un gruppo che ne fa divertir un casin, anche quando che sarie de ciaparli a piade...
No, el presidente no ve lo lasso: incasinado che no gavè neanche idea quanto, con mille pensieri e un novo erede, xe proprio quel se disi el primo tifoso... Pay se lo tignimo: strento.
...e comunque... Maestro, forza PM!
Nessun commento:
Posta un commento